❮ Terug

Bleumkes vuur moo


Ja mooderdag, ie hebt ‘t toch neet vergett’n? Der is völle veràànderd met het verlôôp’n van de joar’n. In die vroggere tied’n wadd’n de bloom’n neet zo riekelijk vuur hàànne. Het heul met ne primula of ne geranium wal op. Primulaas, ie mônn’n der met oppass’n. Àj’ der neet tèèg’n kônn’n, zat ie ne dag later kàànt ôônder de pukkels. Völle vaaker maak’n ie vuur moo, ’n bloom’ntuin trechte. Vaa was neet van ’t bloom’n kôôp’n. Àmoa geelddeuntjes, was zien gezegde. Nee het gung met zelfgekweekte Afrikaan’n. Afrikaan’n, kan det nog wà in disse tied? Toen wà en ne wekke of wat later was het één en al oranje, biej oôns in ‘n hof. Wiej wadd’n der grèuts op en onze Afrikaan’n bleui’n het hèèle zommer vedan. Mooderdag, de telefoon geet. Wat vukke bloom’n wil mamma hemm’n? Twei hangers vuur an de schuure. Ja, wiej bint van de vaste plàànt’n. Zelf heiw we de ofgelôôp’n wekke de begonias in de grôônd ezet. Een klèine tweihonderd stoat er her en der in riegjes en perkjes. Gelukkig gen vörs meer, nee wiej hebt er good weer op ehad en ie zeet ze in een paar daage tied de grôônd uutscheet’n. De hèèle wekke zag ie moo wreut’n in den tuin. Zelf hè ‘k èigelijk neet van die greune vingers. Mooder wà, zie steet hèèle daag’n op ’n kop tuss’n de plàànt’n, um het leste blèèike mà weg te krieg’n. Het lig ter zô gangswieze superglad biej. Zô lange as ’t duurt. De blaa bint dan wà van de bèume, mà met de èèrste bujj’n en wind, is de stoepe wier verzadigd met al die bleuisels van de bèume. Verzet er oe neet tèèg’n, de natuur blif het van oe winn’n. Ja, mooderdag, de tied dàj’ nog ne vaa en moo hadd’n, lig inmiddels veer achter ôôns. Ie kiekt er met dàànkbaarhèid op trugge. Ôôit hè ’k ter een versje oaver eschrèèm’n. Één coupletje mag ter hier neet ontbrekk’n.

Kiek doar die vlakke wiedse wèid’ns, Twei zwoare eek’n biej het ôôle huus.
De stèè van ôônze oolders. Joar’nlàànk was det mien thuus.
Kiek doarginds den Hoolterbarg. Met Hoolt’n, röstend an zien’n voot,
Hoe môôi, det tuintje biej ôôns huus. Bleumkes vuur moo, ik bin wier thuus.

Mooderdag en vaderdag, hôôlt ’t in eere. Geniet er van, de tied geet rapper, as dàj’ arg in hebt. Vuurdàj’ met de ôôg’n könt knippern, bint ze uut de tied en köj’ der allèène nog mar oaver schriem’n en vertell’n.

Maart 2024
MA DI WO DO VR ZA ZO

1

1

2

2

3

3

4

4

5

5

6

6

7

7

8

8

9

9

10

10

11

11

12

12

13

13

14

14

15

15

16

16

17

17

18

18

19

19

20

20

21

21

22

22

23

23

24

24

25

25

26

26

27

27

28

28

29

29

30

30

31

31

Vorige

Volgende