Categorieën

Column: Vakàààntie

À wier een joar vuurbiej. De tied vlug en wat is ter ne hôôp gebuurd in ôôns môôie Hoolt’n. Ôôns môôie Hoolt’n, dew we àmoal ontvlucht, um is een kèèr op ààndere gedacht’n te kômm’n. Èèm’n de knop umme zett’n, èèm’n de zörg’n achter oe loat’n. En de achterblievers, die vangt de vrèimd’n op, diet hier langs de wèège zwarft, um ne wekke of wat vakàààntie te hôôld’n. Zie hebt geliek, want in Hoolt’n duurt de vakàààntie langer as in al die ààndere plaats’n. Vuur die lèu en de achtergeblèèm’n Hoolter, een paar tips um op te nemm’n in oen vakàààntieprogramma. De zommerse zundaage in het hartje van Hoolt’n, möj’ neet vergett’n. Het is ter onmeunig gezellig.

Ôk het rondje Smidsbeelt op de dôônderdagoamde möj’ minstens één kèèr belèèm’n. Veerder is ter zôvölle te bekiek’n wat de meuite weert is. Wààndelt is ne kèèr oaver het Möll’npad, noar de Steen’n Bàànke op ’n Zoerbarg, of op oen dôôie gemak noar ’n Canadeez’n Karkhof en Piet Bos op ‘n Hoolterbarg. Wèèst neet bange dàj’ doar verhongerd, der is etgelèèg’nheid genog. Netuurlijk köj’ het ôk met de fietse doon, dan nem ie der de Diekerhookse Mölle ôk nog èèm’n biej en fietse oaver het Hoolterbrook, biej de Pothaar langs. Èèm’n vaar’n noar de Middeleeuwse grèènze tuss’n Sallàànd, Twèènte en ’n Achterhook, doar op de splitsing van de Ôôlde Bekke en de Botterbekke.

Ie bint hèèmoa weg uut de jachterige tied van vandaage en waant oe in de vèèrtiende eeuw, met hèèl in de veert’n, de Waardenborch biej Hoolt’n en Arkelsteyn, ôônder Battum. Àj’ alle môôie dinge in en umme Hoolt’n bekiek’n wilt, möj’ volgend joar hoaste wà wier kômm’n. Ie hebt de kinderboerderiej van Dôôndertman nog neet ezeene, de genèèverbess’n op de Borkeld, de putte van Juleke, de Motieweg en het machtige uutzich oaver Sallàànd van Zwolle tut an Zutphen. Met een betje geluk en ne hôôp fantasie zeej’ biej het Station ôônz’n Dikken Steen ôk nog ligg’n. Het verhaal van den duuzenden joaren ôôlen Steen is àllèène à de meuite weert um te wèèt’n.

Biej de VVV in het Kultuurhuus könt ze der oe nog völle meer oaver vertell’n. De Hoolter kràànte möj’ de kommende drei wekke miss’n, mà doar völt met te lèèm’n. Vuur alle lèu diet Hoolt’n vuur èèm’n achter zich loat, ne hèèle fijne vakàààntie en komt àmoa gezôônd wier. Vuur de achterblievers en miejzelf veult het altied as vakàààntie, Sallàànd, Sallàànd, hier is mien stèè, woet het lèèven vedan geet in röste en vrèè.