Categorieën

Hier is mien Diekerhook

Halverwèège de ôôle Mölle en Hoolt’n, zeej’ in één kèèr, mill’n het Sallààndse làànd, oaverà langs de weg de versiering’n. Ja, het is wier zô veer. Diekerhook geet de kômmende wekke uut zien dak. Vanuut Hoolt’n is Diekerhook makkelijk te vind’n, ôônder de grôôte poorte hen en dan, tut an de versiering, rechduur. Grôot feest, het begint vuur de schoolwichter al op vriejdagmänn’n. De euldern möt dan nog èèm’n wacht’n tut ’s oamds, um te kiek’n of ze nog op de hakke wordt enömm’n in de Diekerhookse Revue. De Splôôder komt vaste wà met ne extra busse, want zie wordt ieder joar wal eneumt en ie wèèt wat de börgemèister zeg, glèèske op, loat oe ried’n.

Netuurlijk, nôôit te völle drink’n, want ‘n ààndern männ’n möj’ à vrog op de beene wèè um, tèèg’n tien uur, de optocht te zeen vertrekk’n noar de feestwèire. De muziek begint zoaterdag à vrog. ’S middags um vèèr uur trapt de Reeperbahner geneuglijk of met Prins Hens van Kalverderk as vuurzanger. Later op ’n oamd kump topdrummer en dirigent Michiel vuurbiej met de Euro’s. Tèèg’n die tied steet den ààndern dirigent vaste à wà met ziene meuige vuur het toneel te zwaai’n. Hôôlt het röstig, ààns köj’, op de muziek Beatrock, nog wal is uut de bochte goan met Annie. Het is te hopp’n det de vloere stark genog is, ààns haalt den het èine van ’n oamd neet. Zundagmänn’n, as de jeugd nog lig biej te komm’n van al die machtige harde rock en öllievaat’nmuziek, bint de senioor’n an de buurte.

Ôônder het genot van een köpke koffie en de Grösmeijers uut Markel, könt ze met mekaa een brèudje ett’n um zich op te warm’n vuur ne middag ôôlderwets Diekerhooksfeest. Het geet van jetje, met polonaises, inheuik’n en wals’n en as toetje boer’nrock. Hier möj’ biej weer en let op, ’n hèèl’n zundag màj’ der vuur niks in. Ech, ne dag vuur de hèèle femilie, met genog spölruumte en attracties vuur de kleintjes. Het blif lange duurgoan met “Opschaakel’n”. Remm’n is angst, is het motto van disse band, det kan bes wèè, mar op tied op de remme is vuur een machtig Diekerhooks feest neet verkèèrd. Àmoal onmeunig völle wille en met een viske op de voes op huus an.