Categorieën

De Sallààndse vlagge

Sallàànd, Sallàànd, hier is mien stea. Wie zingt het biej ieder feesje, mà nen eeg’n vlagge was ter tut noe touw nog nôôit. Doar kump verààndering in. Honderd één en dartig ontwarp’n bint er in e stuurt en doarvan bint er vèère uut ekèuz’n. Iedereene kan op internet kiez’n, wat vunne vlagge of de vuurkèur hef. De volgende wekke zal bekèènd word’n wat vunn’n of hef ewunn’n. Wie loat ôôns verrass’n. Wus ie trouwens wà det Sallàànd onmeunig grôôt is? Van Dèimter noar Zwolle, tut Hard’nbarg en langs Riess’n en Hoolt’n tut an de Schipbekke. Vuur Hoolt’n is het duudelijk. Wiej ligt an de grèènze. Det is good te mark’n, àj’ op Loarne an goat. Doar op het Loarnse brook zeej’ oaveral de Achterhookse vlagge. Goaj’ op Markel an dan zeej’ à rap het Twentse Ros.

De Sallààndse Landweerd löp nog altied vanof de Waerdenborch, via de Botterbekke noar de ôôle Bekke. Doar biej de Pothaar, het drei làànd’npunt van Sallàànd, Twèènte en ’n Achterhook. Drei vlagg’n an de ôôle Bekke. Een môôi verhaal toch. Hoe môôi zôl het wèè at oaver ne wekke of wat de nieje Sallààndse vlagge zol wappern op het ôôle kasteel van de Waerdenborch. In de Middeleeuw’n, de duurgàànk noar Twèènte. Of an de Bekke biej de Wippert, um de Geeldersen te loat’n zeen, tut hier en neet veerder. In disse tied van, grötter, grötter, grötter, zeukt de mèènsén noar het eegene, het grèuts weer op eeg’n umgèeving.

Doar is niks met, ie hooft mekaa neet noar het lèèm’n te stoan, zô as, de Drost’n van Sallàànd op Arkensteen det dèud’n met de roofridders van Verwoolde. Grèuts op eeg’n streek met respekt vuur de buur’n. In Dèimter veult ze zich tèèg’nswoorig, jammer genog, meer stedeling dan Sallàànder. Det was in die ôôle tied’n wal ààns. Zie vöcht’n um de Schipbekke, de Vecht en de Regge, um mà te könn’n hààndeln in de Pruusse. Héé, hoe gek kan het weer, zie vöcht’n met die ààndere Sallààndse grôôtmacht, Zwolle. Bèire Sallàànds gebied, bèire straks dezelfde vlagge? Zôl dan èindelijk det gekissebis op het voetbalveeld tut een èine kômm’n? Wie zölt het zeen. Op het plattelàànd lèèft meer het Sallààndse geveul.

Det mag röstig bliem’n bestoan en de eenheid kan allèène mà starker word’n met nen eeg’n vlagge. Sallàànd pakt duur en det mag, want net zô good at de lèu grèuts bint op Twèènte en ’n Achterhook, meuge wiej det wèè op ôôns Sallàànd.