Categorieën

De Wienpreuverinnen

Het môs ter netuurlijk ne kèèr van kômm’n. Vroole biej de carnaval. Mà de menèère woerop was meer dan vuurtreffelijk. Niks gen gezeur van biej mekaa, mà neuist mekaa. Mekaa starker maak’n. Alles in good oaverleg. Ofgelôôp’n zoaterdag biej de Poppe. In nen op ziene grôôndvest’n deinende zaal, kwamm’n ze binn’n, de Hoolt’nse Wienpreuverinn’n, gelieke à 33 man stark. Het kon àmoa. Noa het serieuze goeie begin van de Hoolt’nse dichter, wörd’n verschillende Hoolter, woeronder netuurlijk de prins, compleet of e “rèustert”. Sommige Fienpreuvers kônn’n neet gelèum’n wat er àmoa wörd’n presentèèrt. Keiharde humor, anno 2020.

De lachsalvo’s, de oeh’s en ah’s wadd’n neet van de lôch. De zaal was stààmpende vol. De Gorsselnarren en de Battemse Pôômpers kekk’n zich de ôôg’n uut, zôvölle jôônk volk as ter was. Toen de Wienpreuverinnen éénmoa binn’n wadd’n kon het grôôte fees beginn’n. De Road van Elme van de Fienpreuvers an de rosé. Doarnoa nog ne klapper, ne geweldige medley van zangnummers wisseld’n mekaar in een roazend tempo of. As of det nog neet genog was, kwam de ôôle bänd van de Prins nog in aktie. De cape gung of en de prins stun as echte frontman wier èèm’n op de bühne. Noh ja, èèm’n, het duur’n mar èèm’n of de tèènte stun compleet op zien kop.

Vèurspiejende muzikàànt’n, diet de zaal compleet uut het dak leut’n goan.. Het lek wal oorlog, toen in vief minuut’n tieds, de duuzenden ballonn’n, ééne vuur ééne tut knapp’n wörd’n ebrach. Een machtig feest en an het èine van ’t verhaal had de nieje carnavalsclub à meer dan dreihonderd leed’n. In eur residentie, biej het Klavier gèèft ze op 21 februari hun èèrste grôôte carnavalsfeest. Det is op de “goodwilloamd” van de Fienpreuvers. Mooders, dochters en oma’s, zörgt dàj’ der biej bint want dit bint oamde, um nôôit te vergett’n.

Ie markt ‘t, carnaval broest in Hoolt’n de panne uut en iedereene mag met doon. Èèrs ankommenden zoaterdag noar manege Snorrewind, want ôk de minder valide lèu wordt neet vergett’n. Ôônder anvoering van de Brààndheultjes, diet ôk à wier dartig joar met bloast, zölt ôk zie wier ne môôien middag hemm’n. Goat er mar is een kèèr hen kiek’n. Woew we netuurlijk àmoa noar uutkiekt, ôônze Wienpreuverinnen in de Kèunedarpse optocht. Mà vuur det het zô veer is, èèrs àmoa op vriejdagoamd noar het Klavier, want oene beste vriendinn’n zit vanof noe biej de Wienpreuverinn’n.