Categorieën

Hoedeuinig möt het veerder goan

Alles potdichte, niks mag ter meer. Het is hoaste neet te doon. Zô good en zô kwoad as het geet, hôôle wiej ôôns an de rèègels. Met rèègelmoat van de klokke doo we de bosschôpp’n in Hoolt’n. Veerder köj’ neet völle beginn’n. De visboer, hij is ter wà, mà met mekaa het leste niejs uutwisseln, ôônder het genot van ne gebakk’n, is ter neet meer biej. Ie vervrèimd van zô völle vriend’n en bekèènd’n. Mà gelukkig kump ter een betje lôch. De lèègere school’n bint wier begunn’n en het vuurtgezet ôônderwies steet op 1 juni in de startblukke. Het geet àmoa hèinig an en det is good.

Het leste waw we wilt, is trugge noar af. Op 1 juni meugt de caféés ok lös. Noh ja, lös, neet meer as dartig man teglieke. Een kaartje legg’n met oe vèèr’n, zôl det lukk’n? Àànderhalm’n meter van mekaa is bes nog wà veer en hoe zit det met de kaart’n. Iederene hef doar met hàànne an ezett’n. Möw we noa ieder pötje wier een niej spel kaart’n hemm’n? Möt de toafel noar iedere spölleke opniejs word’n schôône maakt? Doar kan de kastelein dan nog bes drök met word’n. Heij’ det trouwens ezeene in de tweede kamer.

Doar meugt de obers wal opslag hemm’n, noar iedere interruptie möt de handel wier schôône word’n emaakt. Die keerls lôôpt zich doar de beene uut ’t lief. In ’t café zal ’t wà metvall’n. Het biertje op de bar, köj’ zelf nog wà pakk’n en vuur det kaart’n zal der ôk wà nen oplössing komm’n. De zangers ôônder ôôns zölt nog èèm’n wat langer mönn’n wach’n. Vanof 1 juli màj’ wier met 100 man biej mekaa weer, netuurlijk wal op àànderhalm’n meter ofstàànd, mar het is een begin. Vieftig man op ’n Beelt op 200 vèèrkàànte meter, met de terrass’n lös en zing’n al wat oe eleert is. Het kan neet snel genog goan.

Zô zit e wiej à wier te klasjenèèr’n oaver klèine dinge. Het grôôte verdreet in völle femilies biw we te gauw vergett’n. De grôôte financiële probleem’n diet an alle kàànt’n op ôôns ofkômt drukke wiej vôt. Wiej bint er nog lange neet. Jonge lèu diet het ech wà moeilijk hebt en zich ofvroagt, hoedeuinig möt het veerder goan. Wiej meugt gelukkig stapp’n vuuruut zett’n. Het antal zeek’n op de I.C. daalt hard. Loaw we ôôns, hoe moeilijk ôk, an de rèègels hool’n, zôdet wiej volgende moand wier ne trad vuuruut könt doon.