Categorieën

Van Puffelen dut alles àllèène

Och, ie kent ze wà. Keerls diet al eur lèèm’n keihard hebt ewarkt. Aarige lèu, een betje eeg’nzinnig, mangs tèèg’n eeg’nwies an. Zien vaa melk’n nog een paar beesjes en doar deur e wat timmer- en metselwark biej. Noa ‘n oorlog wörd’n het timmerwark allèène mà meer. Zie krèèg’n duur de wederopbouw, de wind in de zeil’n. Het boer’nbedriefke gung an de kàànte en in de joar’n zestig nam Van Puffelen het bedrief oaver. Verschèid’n vèèschuur’n en ààndere bouwwark’n wörd’n duur ‘m ebouwt. Hij kon der op verjeuirdaag’n machtig oaver vertell’n. Noe, zôvölle joar’n later, möt ’t wat hèiniger an doon en det is noe net woet e meuite met hef.

Gelukkig was ter altied nog wà wat te doon in de warkplaatse en um ‘t huus hen, maar toen zien harte ‘m waarschouw’n, môs e doar ôk de remme op zett’n. Met ne nieje hartkleppe kwam e der wier redelijk boam’nop. Natuurlijk, de èèrste tied, röstig an doon. Det blèèf moeilijk. Toen zien inwonnende dochter angaf, dat ze geerne meer ruumte wol hebb’n, had e zien plan binn’n de kortste kèèr’n kloar. De tèèkening’n wörd’n emaakt en vuur det er eene ôk mar iets in de gaat’n had, wadd’n de bèume umme heuiw’n en gung de schuppe de grôônd in. Het gung van een leien dakje.

Het grèèfwark was edoane en het metseln van de fundamèènt’n zôl e ôk èèm’n zelf doon. Het was zien projekt, gen mèènse kwam der an te passe. Toch blek toen det de joar’n ech wà met tell’n. Zô mar in één kèèr schöt ’t hem in de rugge. Hij kon gen trad meer verzett’n. “Belt de zeek’n waag’n mar op.” was zien commentaar. Gelukkig was det neet nèurig, mà de èèrste daag’n was het zwoar behelp’n. Met drei man môss’n z’m uut ’n stool heis’n. Ziene vrouwe had er wèinig beklag met.

“Loat de jongs oe dan ôk help’n.” Hij blèèf onverbiddellijk, met de woord’n, “Nee, dit is mien projekt, dit maak ik àllèène of.” Ja, zo is e, wat in de kop hef, hef e neet in de kôônte, mà vuurèèrs is ter ne bouwstop. Gelukkig geet het à wier een betje better en met een paar asperientjes op zien tied, hopt e oaver een dag of wat veerder te goan met zien projekt. Zô lange zal e zich mött’n inhôôl’n. Ziene vrouwe verzucht, “Van Puffelen wil altied alles allèène doon”.